На 04.04.2025 во 15 часот во село Колешино, струмичко, полициски службеници од СВР Струмица го лишиле од слобода В.К.(65) од село Колешино.

Како што соопшти МВР, врз основа на судска наредба бил извршен претрес на три локации кои ги користи лицето, при што на катастарска парцела во село Борисово, струмичко, биле пронајдени неколку вреќи и повеќе најлонски пакувања исполнети со зелена растителна материја, вреќа со остатоци од растителна материја, семки од растение, вага, како и други предмети со остатоци од растителна материја. Одземената растителна материја е со тежина од околу три килограми.

На 06.04.2025 во 14.40 часот во беровско село, полициски службеници од ОВР Берово ги лишиле од слобода Г.А.(37), Б.Ч.(23) и 60-годишната Р.Ѓ., тројцата од Струмица, постапувајќи по претходна пријава дека од семејниот дом на Д.В.(59) од Делчево со употреба на сила ја земале 32-годишната вонбрачна сопруга на неговиот син и со патничко возило „ауди“ со струмички регистарски ознаки заминале од местото.

Беласица забележа голема победа од 4:1 над екипата на Вардарски во меч од 23. коло на Втората лига, кој се одигра на стадионот „Благој Истатов“ во Струмица.

Димче Јовов постигна гол за 1:0 на полувреме. Во вториот дел Александар Богданоски постигна два гола, а еден гол постигна и Кире Стојанов за 4:0.

Во финишот на мечот гостинот од Богданци постигна гол преку Даријан Трајчов во 85. минута за конечни 4:1.

Беласица ја забележа четвртата победа во низа и со тоа се проби на табелата за делба на шесттото место заедно со екипата на Скопје со по 34 бодови, а пак Вардарски останува на дното со осум бодови. Во следното коло екипата на Беласица ќе гостува во Кочани кај Осогово.

Александар Ванев, Струмица Сити

Фудбалерката на Тиверија Брера од Струмица, Теона Галабовска, ги одигра првите минути за сениорската женска репрезентација на Македонија, откако 17-годишната фудбалерка го имаше својот деби настап за Македонија на мечот против Летонија.

„Горди сме на нашите девојки и на секој нивен постигнат успех“, велат од ЖФК Тиверија Брера, по дебито на нивната фудбалерка за сениорската женска фудбалска репрезентација на Македонија.

Инаку, женската сениорска репрезентација на Македонија загуби со 1:2 од селекцијата на Летонија на домашен терен во рамките на второто коло од групата 6 (сегмент Ц) од новото издание на Лигата на нации за пласман на СП 2027.

Александар Ванев, Струмица Сити

Екипата на Наковски Волеј го освои првиот трофеј во својата историја од Купот на Македонија, совладувајќи ја Јанта Волеј со 3-2 во сетови, во драматично финале одиграно во спортската сала „25 Мај“ во Радовиш. По два неуспешни обиди, третата среќа им донесе радост и злато на струмичките одбојкарки.

• ПОГЛЕДНЕТЕ ЈА ОГРОМНАТА РАДОСТ НА ОДБОЈКАРКИТЕ НА НАКОВСКИ ВОЛЕЈ:

View this post on Instagram

A post shared by Спортска Мрежа со Александар Ванев (@sportska_mreza)

Финалниот натпревар понуди вистинска драма на теренот. Скопјанки го добија првиот сет со 16:25, но Наковски Волеј возврати со 25:18 во вториот. Јанта Волеј повторно поведе со убедливи 25-10 во третиот сет, но струмичанки не се предадоа – изборија петти сет со победа од 25:21 во четвртиот.

Решавачкиот петти сет започна израмнето, но Ковачевиќ ги поведе своите со предност од 8-5. По тајм-аут, Јанта Волеј се врати во игра и поведе со 10:8, но Наковски Волеј повторно најде начин да се консолидира. Ковачевиќ го донесе конечниот триумф од 15:13 и голема радост за струмичкиот состав.

Љиља Ковачевиќ со 17 поени беше најдобар поединец на мечот, додека Мери Бошковска запиша 16 поени. Од друга страна, за Јанта Волеј ова беше шесто загубено финале во седум настапи.

Александар Ванев, Струмица Сити

Ракометарите на Астарион претрпеа висок пораз од суерлигашот Куманово во елиминационото коло од Купот на Македонија, откако струмичани загубија со 35:18.

Победата беше најавена уште во првиот дел од мечот кога резултатот беое 18:9, а во вториот дел се играше само формално со што Куманово ја потврди очекуваната висока победа.

Иван Димитров со 11 гола беше најдобар стрелец кај Куманово, а пак кај Астраион се истакна Кире Георгиев со седум погодоци.

Астраион ги завршува настапите во Купот, а струмичани во Првата лига ќе играат во плеј-аутот.

Александар Ванев, Струмица Сити

Сосема беше очекувана високата победа за Слога Виница, која со 0:7 ја декласираше последнопласираната Тиверија, во натпревар кој се играше на теренот со вештачка трева во Струмица, а во рамки на 11. коло на Трета лига – Исток.

Тимот на Емил Грнев дојде до лото победа преку двојниот стрелец Игор Ѓорѓиев, а по еден гол постигнаа Филип Петковски, Иван Настевски, Петар Љамчевски, Александар Илиев и Октај Амедов.

Струмичани не играат според посакуваното во тековната сезона и се наоѓаат на дното од табелата, со што Тиверија ја очекува тешка битка за опстанок во Трета лига – Исток.

Александар Ванев, Струмица Сити

Трите бодови остана во Делчево откако екипата на Брегалница со 2:0 го доби некогашниот прволигаш Хоризонт Турново, во рамки на 11. коло на Третата македонска фудбалска лига – Исток.

Резултатот го отвори Дарко Пешовски во 18. минута за 1:0, а на стартот од вториот дел новото засилување Јован Дојчинов постигна гол за 2:0.

Во 57. минута Филип Димитровски поради два жолти картони беше исклучен од игра, па Брегалница Делчево до крајот беше со играч помалку на терен, но тоа не го искористи Хоризонт Турново, па трите бодови останаа во Делчево.

Александар Ванев, Струмица Сити

Беласица преку пресврт во три минути ја доби Каменица Саса и ја продолжува победничката серија, откако струмичани славеа со 1:2 во меч од 22. коло на Втората македонска фудбалска лига.

Мрежите во првиот дел мируваа, а во второто полувреме Тони Мичковски постигна гол за 1:0 во 60. минута со што Каменица Саса го отвори резултатот и прва дојде до предност на Градскиот стадион во Македонска Каменица.

Струмичани во 82. минута израмнија преку автоголот на Дарко Алексовски, а само три минути подоцна Огнен Здравковски постигна гол за 1:2.

Беласица има три победи во низа, на своето конто има 31 бод за делба на деветтото место и само три бода негатива од петтото место.

Во следното коло Беласица како фаворит ќе игра на домашен терен против последнопласираниот Вардарски од Богданци.

Александар Ванев, Струмица Сити

Од следната натпреварувачка сезона 2025/2026 Општинскиот фудбалски сојуз (ОФС) Струмица ќе формира општинска лига или Четврта лига по ранг на натпреварување.

Сите заинтересирани клубови од општина Струмица, Ново Село, Босилово, Василево и општина Радовиш може да пријават учество за следната сезона. Рокот за пријавување е до 20. август 2025 година.

„Општинскиот фудбалски сојуз на Струмица со задоволство објавува иницијатива за формирање на нова Општинска фудбалска лига за сезоната 2025/26. Оваа лига има за цел да ги обедини локалните фудбалски клубови и да го поттикне спортскиот дух во нашата заедница“, велат од ОФС Струмица.

Почетокот на сезоната, како и натпреварите ќе бидат договорени дополнително, а категоријата на натпреварување е сениори.

Сите кои се заинтересирани за пријавување можат да контактираат на 071 399 659 и 071 234 414, како и на ofs.strumica@hotmail.com

„За повеќе информации и детали околу правилата и форматот на натпреварите, ќе бидете дополнително известени по завршувањето на процесот на пријавување. Ве охрабруваме да бидете дел од оваа иницијатива и да придонесете кон развојот на фудбалот во нашите општини“, дополнуваат од ОФС Струмица.

Веќе неколку сезони нема Општинска фудбалска лига во Струмица, ниту во Радовиш, а потегот на раководството на ОФС Струмица и претседателот Илија Илиев е за поздравување со тоа што ќе се врати локалниот фудбал, ќе има можност за развој на истиот во гореспоменатите општини, а од каде ќе може да се влечат фудбалери во екипите од овој регион кој се натпреваруваат во повисок ранг на натпреварување.

Александар Ванев, Струмица Сити