Фудбалскиот клуб Брера Струмица објави дека по четиримесечен ангажман, договорно ја раскинува соработката со шефот на стручниот штаб, Горазд Михаилов.

Искусниот стратег пристигна во клубот на почетокот на септември, по заминувањето на Бојан Круљ, и во својот краток престој остави значителен белег во работата на првиот тим.

„Со својот професионален пристап, кредибилитет и авторитет, Михаилов успеа да ја стабилизира играта на нашиот прв тим, но и да даде можност на десетина млади фудбалери од нашиот младински погон да ја почувствуваат тежината и одговорноста во Првата лига.“ – стои во соопштението на клубот.

Во есенскиот дел од сезоната, Михаилов предводеше тим кој оствари четири победи, четири нерешени резултати и шест порази, што е значајно постигнување, особено со оглед на турбуленциите со кои се соочи екипата. Особено внимание привлече неговата посветеност на интегрирањето на младите играчи во тимот, создавајќи уникатна фузија меѓу младоста и искуството.

„ФК Брера му искажува голема благодарност на Михаилов кој, иако беше краток период во нашиот клуб, остави голем печат со својот професионален однос. Му посакуваме успех во понатамошната кариера. Горазд, ти благодариме.“

Овој потег означува крај на кратката, но успешна соработка меѓу Михаилов и Брера Струмица, оставајќи отворено прашањето за тоа кој ќе биде следниот тренер на клубот.

Александар Ванев, Струмица Сити

Завчера во 20.35 часот во СВР Струмица било пријавено дека на магистрален пат Радовиш – Струмица, делница помеѓу крстосница за село Василево и Струмица, се случила сообраќајна несреќа помеѓу патничко возило „опел“ со струмички регистарски ознаки, управувано од О.П.(47) од село Градашорци, струмичко и патничко возило „бмв“ со струмички регистарски ознаки, управувано од М.Т.(21) од село Владевци, струмичко.

Во несреќата со тешки телесни повреди се здобил возачот М.Т., а со телесни повреди се здобил возачот О.П., констатирани во Медицински центар Струмица.

Увид на местото извршила екипа на Полициската станица Струмица.

На 31.12.2024 во Полициската станица Струмица било пријавено дека во куќа на улица „Широк дол” во Струмица бил пронајден починат Д.К.(62) од Струмица. Лекар констатирал смрт поради загушување со чад, а претходно лицето паднало врз електрична греалка и му се запалила облеката. Увид на местото извршиле јавен обвинител, инспектор за пожари и екипа на СВР Струмица.

На 31.12.2024 во 18.30 часот на место викано „Доброшински мост”, струмичко, полициски службеници од СВР Струмица го лишиле од слобода З.В.(22) од село Злеово, радовишко. При преглед на патничко возило со радовишки регистарски ознаки, била пронајдена марихуана и дробилка. По целосно документирање на случајот, против лицето ќе биде поднесена соодветна пријава.

Струмичкиот второлигаш Беласица на 9. јануари ќе ги започне подготовките за пролетната полусезона.

Шефот на стручниот штаб Александар Стојанов на 9. јануари ќе ја има првата прозивка со играчите, а првиот пријателски натпревар ќе се одигра на 17. јануари во Струмица против тетовскиот прволигаш Шкендија.

Беласица есенскиот дел го заврши на 10. место на табелата со 19 бодови на своето конто.

Александар Ванев, Струмица Сити

Во пресрет на празниците, Фудбалскиот клуб организираше традиционално новогодишно дружење за најмладите фудбалери, кое оваа година се одржа во Спортскиот центар Пандев. На настанот присуствуваа деца од генерациите 2012 до 2019 година, кои имаа можност да се сликаат со Дедо Мраз и да добијат новогодишни подароци.

Покрај фудбалерите, новогодишни пакетчиња беа доделени и на најмладите девојчиња од Женскиот фудбалски клуб Брера Тиверија, кои исто така учествуваа во настанот.

Организацијата на ваквиот настан е дел од клубската традиција, која има за цел да ги зближи младите спортисти од различни генерации, поттикнувајќи ги на спортска дружба и пријателство. Оваа година, околу 300 деца се здобија со подароци, а организаторите упатија порака за многу здравје и спортски успех во 2025 година.

Традиционалните новогодишни дружби се важен дел од календарот на клубот, кој активно работи на развојот на младите таленти и изградба на позитивна заедница во спортот.

Александар Ванев, Струмица Сити

Управениот одбор на ФФМ го усвои барањето на ОФС Струмица за повлекување на суспензијата за ОФС Струмица.

Со стапување на сила на оваа одлука престануваат правните и спортските последици на ОФС Струмица.

Ова е од Седницата на Управен одбор на Фудбалска федерација на Македонија.

Александар Ванев, Струмица Сити

Како што информираше ФК АП Брера Струмица, Горан Пандев поднесе оставка од функцијата претседател клубот, откако беше назначен за спортски директор на сите македонски фудбалски репрезентации. Оставката е со цел да нема судир на интереси како и заради неспоивоста на двете функции.

Пандев е основач на клубот, а со превземањето од страна на Брера Холдинг, беше поставен на функцијата претседател.

„Од секогаш сум зборувал и залагал за развој на македонскиот фудбал и дека треба сериозно да се посветиме за прогрес на клупскиот и репрезентативен фудбал. Верувам дека новото раководство ќе го даде тој инпут на кој ќе бидеме горди сите ние како нација. Репрезентациите треба да бидат наша светост и треба да ги градиме во конутинитет. Имаме потенцијал само треба професионален пристап“, кажа Пандев кој веќе не е претседател на ФК Брера Струмица.

Пандев сега има нова функција односно директор на македонските фудбалски репрезентации.

Александар Ванев, Струмица Сити

Кошаркарите на Струмица запишаа нов пораз овој пат загубија од екипата на Работнички 2018 со резултат од 75:62, а во рамки на 10. коло од Втората кошаркарска лига.

Струмичани остануваат сега на дното од табелата со една победа и девет порази со 11 бодови на своето конто, а пак Работнички 2018 скокна до десеттото место со 12 бодови.

Во следното коло екипата на Струмица на домашен терен ќе ја бара втората сезонска победа против Бутел.

Александар Ванев, Струмица Сити

Ракометарите на Астраион загубија на гостувањето во Гостивар, каде во салата „Младост“ беа поразени од Јехона со резултат од 37:30.

Јехона беше фаворит за овој меч и тоа го потврди со сигурна и убедлива победа. Бојан Димовски со 13 гола беше најдобар стрелец кај Јехона, а осум гола имаше Адис Салиу.

Кај струмичани најдобра беше Васе Наков со осум гола, а тола имаше и Александар Цонев.

Со оваа победа Јехона прави чекор напред кон пласман во плеј-офот, а пак Астраион останува претпоследен со два бода.