Category: Струмица

Цветков: Гоце Делчев е запишан во историјата како лик кој обединувал со своите идеи и револуционерни мисли за тоа како се сака и брани својата држава

„На великанот на македонската револуционерна борба, Гоце Делчев денес му одбележуваме 151 година од раѓањето!

Гоце Делчев е запишан во историјата како лик кој обединувал со своите идеи и револуционерни мисли за тоа како се сака и брани својата држава.

Борец кој и денес служи како синоним за вистинска патриотска љубов и дека народите меѓу себе треба да се докажуваат преку модерни и културни идеи, а не со предизвикување конфликти и кризи. Слава му“, рече претседателот на ОО СДСМ – Струмица, Борче Цветков.

Исплатата на финансиската поддршка за ранливи категории на граѓани ќе се изврши на 13 февруари, а списоците на корисниците ќе бидат објавени на 6 февруари

Министерството за труд и социјална политика, ги известува граѓаните дека паричните средства за корисници на финансиска поддршка за справување со енергетската криза, ќе бидат исплатени на 13.02.2023 година.  
Списокот на корисници на паричните средства за финансиска поддршка за справување со енергетската криза ќе се објави на 6-ти февруари 2023 година и тоа:

  • На веб страната на Министерството за труд и социјална политика (корисници на правото на социјална сигурност на стари на лица, посебен додаток, надоместок заради попреченост, корисници на надоместок за помош и нега од друго лице со трајни промени во здравствената состојба без потреба од контролен преглед и не користат право на надоместок заради попреченост, како и самохраните родители кои се евидентирани корисници на гарантирана минимална помош).
  • На веб страната на Фондот на пензиското и инвалидското осигурување на Северна Македонија (корисници на пензија во висина не поголема од 11.525 денари месечно, односно во висина не поголема од 14.000 денари месечно, како и корисници на право на надоместок за телесно оштетување)
  • На веб страната на Агенцијата за вработување на Република Северна Македонија (невработени лица – корисници на право на материјално обезбедување во вид на паричен надоместок).

Списокот се објавува со цел граѓаните да можат да извршат проверка, а доколку лицето не е на списокот, а смета дека ги исполнува условите како корисник на право, може да поднесе приговор до Комисијата за одлучување по приговори за финансиска поддршка при Министерството за труд и социјална политика, во рок од три дена од денот на објавувањето на списоците на корисници на финансиската поддршка.
Приговорот може да се поднесе преку архивата на Министерството за труд и социјална политика или преку електронската пошта mtsp@mtsp.gov.mk.

Списокот на корисници на паричните средства за финансиска поддршка за справување со енергетската криза, ќе биде отстранет од веб страната на Министерството за труд и социјална политика,  веб страната на Фондот на пензиското и инвалидското осигурување на Северна Македонија  и веб страната на Агенцијата за вработување на Република Северна Македонија,  по истекот на три дена од денот на објавувањето.

Костадинов: Треба да знаем во вистинска смисла на зборот, да го почитуваме и негуваме името и делото на Гоце Делчев

„За Македонија се бореше, за Македонија ги негуваше своите социјалистички и револуционерни идеи и за истата таа Македонија го даде својот живот.

Денес, кога одбележуваме 151 година од раѓањето на апостолот на македонското револуционерно движење, Гоце Делчев, треба да знаеме, во вистинска смисла на зборот, да го почитуваме и негуваме неговото име и дело.

Но со право треба да констатираме дека Гоце не се роди за да биде „монета за поткусурување“, ниту причина за повампирување на политички апетити и територијални претензии. Зарем оној кој го разбираше светот како поле за културен натпревар меѓу народите, заслужува да биде наметнат „камен на сопнување“ и омраза меѓу народите.

Вистината за нашето минато и вистината за нашата сегашност нека ни го трасираат патот кон нашата убава иднина. Гоце Делчев, бездруго и во таа иднина ќе го има своето заслужено место во меморијата на нацијата и државата македонска.

Нека ни е вечен споменот за раѓањето, животот и револуционерниот пат на најголемиот македонски син“, рече градоначалникот на општина Струмица, Костадин Костадинов.

Големо засилување за Академија Пандев, Матеј Цветаноски доаѓа во Струмица!

Академија Пандев за пролетниот дел од Првата македонска фудбалска лига добива супер-засилување во името на Матеј Цветаноски.

25-годишниот крилен играч се враќа во македонскиот шампион и ќе го облече дресот на „пандевци“, а во Струмица доаѓа од редовите на албански Партизани.

Во својата кариера има настапувано за Шкупи, Вардар, Пелистер и Македонија ЃП на домашната сцена, а пак на меѓународната беше дел од Ѓирмот во Унгарија и Партизани во Албанија.

Затвореник во струмичкиот затвор чекал дрога од брат му, но истиот е откриен и доби кривична

СВР Струмица поднесе кривична пријава Ј.М.(27) од Кочани, поради постоење основи на сомнение за сторено кривично дело „неовластено производство и пуштање во промет на наркотични дроги, психотропни супстанци и прекурсори “. На 19.10.2022 на ул.,,Цветан Димов’’ во Струмица, пред паркинг простор на Казнено-поправната установа Затвор Струмица, полициски службеници извршиле преглед на патничко возило „фолксваген голф’’ со кочански регистарски ознаки, управувано од Б.М. од Кочани, при што пронашле и одзеле кокаин, кој бил испратен од пријавениот, преку Б.М., за неговиот брат кој издржувал казна затвор во Затвор Струмица.

Променливо облачно и многу студено со засилен ветер од северен правец

УХМР

Променливо облачно и многу студено со засилен ветер од северен правец. Наместа, особено на планините, ќе провејува слаб снег.

Наутро во Струмица ладно и променливо облачно со минус 5, преку ден утрински облаци проследени со попладневно сонце и температура од 3 степени.

УХМР

ФОТО: Спортисти на годината 2022 – ЖФК Тиверија со седум награди

Во традиционалната манифестација „Спортист на година“ организирана од Општина Струмица, ЖФК Тиверија доби признанија за постигнатите успеси во минатата година и тоа:

  • Славе Велков – 2ро место во конкуренција Најдобар тренер во сениорска конкуренција
  • ЖФК Тиверија – Сениори – 2ро место во конкуренција Најдобар клуб
  • Ивана Николова – 2ро место во конкуренција Најдобар спортист (сениори)
  • Теодора Димоска – 1во место во конкуренција Најдобар тренер во младинска конкуренција
  • ЖФК Тиверија – Кадети – 1во место во конкуренција Најдобар клуб (младински категории)
  • Теона Галабовска – 1во место во конкуренција Најдобар млад спортист
  • Розита Пецева – Спортска надеж

Општина Струмица континуирано ги поддржува реформите кои се во насока на унапредување на средното стручно образование

Општина Струмица континуирано ги поддржува реформите кои се во насока на унапредување на средното стручно образование, со цел обезбедување на квалификувани кадри и можност за вработување на младите веднаш по завршувањето на средното образование. Тоа го потврди и денеска со одржувањето на настанот „Учи паметно, работи стручно“ во Домот на АРМ, а на кој покрај претседателот на Советот, Марјан Даскаловски и претставници од Општината, присуствуваа и претставници на средните општински училишта и бизнис заедницата.

Од името на градоначалникот Костадин Костадинов, присутните ги поздрави Танкица Митрева, член на Советот на општина Струмица.

-Општина Струмица дава поддршка на активностите на Министерството за образование и наука, кои се во функција на спроведување на кампањата „Учи паметно, работи стручно“ која од оваа година е трансферирана на локално ниво. Во рамките на тие активности општина Струмица ги зема во предвид потребите на компаниите, па согласно таквата практика, поголем дел од нив стануваат дел од предлог-плановите за запишување на ученици во прва година во средните училишта во нашата општина. Како резултат на тоа, се повеќе расте интересот од страна на учениците за запишување во дуалните паралелки. Во учебната 2021/2022 година беа воведени шест дуални паралелки, и тоа по три во средните општински училишта „Никола Карев“ и „Димитар Влахов“. Веќе во следната, односно во тековната учебна 2022/2023 година, беа воведени седум дуални паралелки, од кои една во СОУ „Јане Сандански“ и по три во средните училишта „Никола Карев“ и „Димитар Влахов“. За наредната учебна 2023/2024 година се предлага воведување на една нова дуална паралелка во економската струка, профил економски техничар во СОУ „Јане Сандански“, и една во здравствената струка, профил болничар-негувател во СООУД „Димитар Влахов“, рече Митрева.

На средбата се разговараше и меѓусебно се споделуваа информации кои се во интерес на унапредувањето на средното стручно образование во општина Струмица.

Тампонирање на полски пат од населбата Софилар во Струмица до атар на село Ангелци

Согласно Проектот за партнерство склучен помеѓу Центарот за развој на Југоисточен плански регион и општина Струмица за имплементација на проектот „Подобрување на постојната патна инфрастуктура во руралните средини во Југоисточниот плански регион заради подобар пристап до земјоделските површини“ се врши тампонирање на полски пат од населбата Софилар во Струмица до атар на село Ангелци – општина Василево во должина од 1.850 метри.

Финансискиот зафат на реализацијата на овој проект изнесува околу 1.200.000 денари. Средствата се обезбедени од Министерсво за земјоделство, шумарство и водостопанство, а општина Срумица како партнер во реализацијата учествува со сопствени средства за обезбедување на техничка документација и Надзорен орган.

Ново намалување на дизелот, цената на бензините останува иста

Регулаторната комисија за енергетика и водни услуги (РКЕ) денес донесе Одлука со која од полноќ цената на дизелот се намалува за 2 денари, за два денари се намалува и цената на Екстра лесно масло за домаќинство, додека пак цената на бензините останува иста.

Цени од 04.02.2023 00:01 часот:

  • Моторен бензин – ЕУРОСУПЕР БС – 95 – 84,00 (денари/литар)
  • Моторен бензин – ЕУРОСУПЕР БС – 98 – 86,00 (денари/литар)
  • Дизел гориво – ЕУРОДИЗЕЛ БС (Д-Е V) – 80,00 (денари/литар)
  • Масло за горење – Екстра лесно 1 (ЕЛ-1) – 78,50 (денари/литар)
  • Мазут М-1 НС – 41,346 (денари/килограм)