Третото коло од Втората македонска фудбалска лига се комплетираше со натпреварот во Струмица под рефлектори меѓу Беласица и Охрид натпревар кој заврши без победник со по еден гол (1:1).

Двете екипи тргнаа по прва победа во новата сезона, Беласица го играше првиот меч на домашен терен, го прослави својот 102-ри роденден, но не ја израдува публиката со победа.

Охрид прв дојде до водство со голот на Филип Димоски, а потоа од слободен удар со атрактивен гол Љупчо Христовски во 37. минута погоди за 1:1.

Во вториот дел шанси се редеа и пред двата гола, но без завршница, мрежите мируваат и на двете страни, па резултатот од првиот дел стана конечен.

Репрезентативната пауза ќе биде добредојдена за анализа на досега одиграно и за промени кои би требало да се направат кај одредени екипи кои не тргнаа според планот и посакуваното.

Александар Ванев, Струмица Сити