Второ место за Фросина Андреева на државниот натпревар за млади библиотекари

Фросина Андреева, ученичка во основното општинско училиште „Видое Подгорец“ од Струмица го освои второто место на тринаесеттиот републички натпревар „Млади библиотекари 2012“ кој се одржа во Скопје. Андреева второто место го освои во конкуренција на 22 натпреварувачи од основните училишта во Република Македонија. Таа учествуваше на овој натпревар како првонаградена  на општинскиот натпревар „Млади библиотекари“ откако со освоени максимални 186 поени го освои првото место на општинскиот натпревар „Млади библиотекари“ што се одржа во библиотеката „Благој Јанков Мучето“ во Струмица. На натпреварот кој се оддржа по десетти пат учествуваа 30 кандидати од општините Струмица, Василево, Босилово и Ново Село.

 

Со европски пари ќе се гради трим патека во Банско

Општина Струмица доби европски пари за уште еден, трет проект со што ја потврдува водечката позиција во Македонија во искористувањето на средства од европските фондови. Станува збор за изградба на трим патека во Банско, проект кој ќе биде реализиран во рамките на програмата за меѓугранична соработка помеѓу Македонија и Грција, а во кој партнери ќе бидат општина Струмица и регионот на Северна Грција.

Вкупниот грант од ИПА програмата за изградба на трим патеката во Банско изнесува 134.500 евра. Трим патеката ќе биде долга 604 метри и ќе се протега од центарот на селото до хотелот „Цар Самуил“, поврзувајќи ги кружно најзначајните културно – историски и туристички обележја во Банско. Ќе биде опремена  со справи за рекреација и вежбање, клупи за одмор на рекреативците, а истата ќе биде и соодветно осветлена. Дел од средствата ќе бидат насочени и за развој на туризмот и промоција на туристичките потенцијали. На овој проект му претходеа проектот за создавање на енергетско ефикасно и енергетски независно училиште, што ќе биде имплементиран во ООУ „Сандо Масев“, а во рамките на програмата на ЕУ за прекугранична соработка помеѓу Македонија и Бугарија и проектот за втората фаза на реконструкција, реставрација и конзервација на бедемите од локалитетот Цареви кули, како најдобро рангиран проект од програмата на ЕУ за прекугранична соработка помеѓу Македонија и Грција.

- Со овој проект, општина Струмица успешно ја заокружува 2012 година во поглед на ползувањето на европски средства од ИПА програмата. За трите споменати проекти од исто толку грантови општина Струмица добива безмалку 700 илјади евра, што ја става на водечката позиција во нашава земја. Овој успех не е случаен, туку претставува плод на еден континуиран професионален ангажман на луѓето од општината, особено на оние од одделението за локален економски развој кои придонесоа веќе неколку години по ред, Струмица да ги добива најголемите европски грантови во Македонија. Заклучокот од сето ова би бил дека е важно да тропнеш на вистинската порта, но уште поважно е со каков проект ќе успееш во намерата таа порта да ти биде отворена. Општина Струмица има намера и во иднина со квалитетни проекти да биде мета за европските средства, со што ќе придонесува за понатамошно зголемување на квалитетот на живеење на своите граѓани. Со тоа и понатаму ќе останеме урнек за другите општини, но и за државата која како да нема стратегија за максимално искористување на европските фондови, рече на денешната прес конференција градоначалникот на општина Струмица Зоран Заев.
Инаку, општина Струмица досега од европските фондови има искористено над 13 милиони евра.

Интервенции на ТППЕ – Струмица во изминатата недела

Во изминатата недела територијалната професионална противпожарна единица на Струмица имала вкупно пет  интервенции. Со пожарникари и возила се интервенирало на три  локации во градот, на улиците „Прилепска“ , „Моша Пијаде “ и Бетовенова и тоа  во гаснење на запален отпаден материјал и технички интервенции . Освен во градот, пожарникарите имале работа и во населеното место Водоча како и на регионалниот пат Струмица- Радовиш . Во с. Водоча гаснеле запалено стрниште, а на регионалниот пат имале техничка интервенција- сообраќајна незгода на ПМВ. Со брзото делување на противпожарната единица во сите пет случаи, се спречени последици од поголеми размери.

Временска прогноза за понеделник, 22 октомври

Времето денес сончево со заоблачување во подоцнежните часови. Дневна температура до 24 степен.

Одржан турнир во мал фудбал за младите Социјалдемократи

Во СОУ ,,Никола Карев” денеска Социјал демократската младина на Македонија, локален клуб Струмица, организираше турнир во мал фудбал како дел од програмата за спорт и рекреација.
,,Со оваа активност сакаме да апелираме на сите млади повеќе да спортуваат со цел да го задржат здравиот дух во себе, затоа што нема ништо поважно од здравјето” – изјави Коста Костадинов, претседател на ЛК СДММ – Струмица.
Оваа година на натпреварот учествуваа осум екипи со по осум играчи. Прво место освои екипата на 8б МК, второ 1б МК, а треба 3МК.
На победниците им беа врачени трофеи и благодарници од страна на престедателот на ОО СДСМ – Струмица Марјан Даскаловски, претседателот на ЛК СДММ Коста Костадинов и секретарот на ЛК СДММ Столе Коциров.

 

 

https://www.facebook.com/media/set/?set=a.284388211677764.66851.261733853943200&type=1

Временска прогноза за недела, 21 октомври

Денеска ќе биде уште еден сончев ден со дневна температура до 24 степен.

Со флеш моб беше одбележана Неделата на италијанскиот јазик

Денеска Младинскиот Совет во соработка со Италијанскиот културен центар ,,Џакомо Леопарди” ја одбележи во Струмица ,,Неделата на италијанскиот јазик во светот” со флеш моб и италијанска музика на плоштадот ,,Гоце Делчев” ,,Неделата на италијанскиот јазик во светот” е еден интернационален настан кој се одвива секоја година во текот на месец октомври со цел да се промовираат италијанскиот јазик и културата во светот од различен аспект. Во склоп на оваа манифестација, на локалните телевизии и радиа ќе бидат проектирани италијански филмови и музика, а струмичани ќе можат така да поминат еден ден ,,All’ Italiana”.

 

https://www.facebook.com/media/set/?set=a.284090571707528.66774.261733853943200&type=1

Временска прогноза за сабота, 20 октомври

Времето денес сончево и топло со дневна температура до 27 степен.

Завршија јавните собири со граѓаните од урбаните заедници

Градоначалникот Зоран Заев ги заврши средбите со граѓаните од урбаните заедници во градот. И на синоќешната средба со граѓаните од втора, шеста, седма и осма урбана заедница што се одржа во Домот на АРМ, отворено се разговараше за проблемите што ги имаат граѓаните и на лице место се нудеа конкретни решенија. По јавните собири во градот следуваат собирите во населените места. Првите два се закажани за 24 октомври, со почеток во 18 часот јавен собир ќе се одржи во просториите на училиштето во Градско Балдовци, а два часа подоцна, јавен собир ќе се одржи во домот на културата во населеното место Куклиш. Јавните собири со граѓаните се одржуваат седма година по ред, а на иницијатива на градоначалникот Зоран Заев. Преку нив се зголемува транспарентноста на општината и им се овозможува на граѓаните активно да учествуваат во партиципативниот буџет на општината. На овој начин се подобруваат условите за живот на граѓаните во урбаните и месните заедници.

 

Новиот кружен тек со хортикултурно уредување

Новиот кружен тек на булеварот „Ленинова“ денеска хортикултурно се уредуваше. Покрај тревната површина се засадија и разнобојни хризантеми. Од ЈПКД „Комуналец“ најавија дека во наредниот период ќе се преуредуваат сите цветни алеи во градот. Летното цвеќе комплетно ќе биде заменето со ново сезонско, во кое најзастапени ќе бидат темјанушките. Со ова и во зимскиот период  граѓаните ќе можат да уживаат во цветните алеи во Струмица.

 

43040899_919171741622888_1449774753454751744_o