Прес конференција на ОО СДСМ Струмица – 18.10.2012

Прес конференција на ОО СДСМ Струмица

Датум: 18.10.2012 година

Презентер: Синиша Илијоски, член на ИО на ОО СДСМ Струмица

 

 

Почитувани претставници на медиумите ,почитувани сограѓани

Проектот ОТВОРИ ВРАТА ЗА ИДНИНАТА веќе ги донесе првите резултати. Граѓаните на Струмица со голема верба ги отвараат вратите на социјалдемократите.

Сaмо за 15 дена испочитувани и посетени се 5.000 домови, остварена е директна средба со исто толку граѓани, добиени се 2.583 конкретни предлози, идеи и сугестии.

Граѓаните го препознаа искрениот пристап, поттикнати и силно мотивирани, активно зедоа учество во овој заеднички проект со свои предлози и идеи.

Граѓаните потврдија дека многу добро знаат кој им ги решава проблемите и кој се грижи за развојот и напредокот на Струмица.

Проектот Отвори врата за иднината продолжува со ист, силен интензитет.

Ќе тропнеме на секоја врата, ќе ги посетиме сите домови, ќе оствариме директни средби со сите граѓани. За добиените предлози и идеи ќе понудиме реални и остварливи решенија.

Благодарение на реалниот концепт сите граѓани ќе можат да се препознаат во програмата на кандидатот за градоначалник на општина Струмица, Зоран Заев.

Истовремено, сакаме да искажеме искрена и јавна благодарност на сите граѓани, без разлика на партиска, верска или етничката припадност,  кои изминативе денови широко ја отворија вратата за иднината, за топлиот прием и личен придонес за уште поубава Струмица.

ОО СДСМ СТРУМИЦА

Општина Струмица распиша тендер за локации за изградба на колективни згради

Општина Струмица во изминатите десет месеци успешно менаџира со државното градежно земјиште, а деновиве распиша тендер за локации за изградба на  колективни згради  во кругот на касарната.  Почетната цена на лицитацијата е 2.030 денари од метар квадратен. Станува збор за атрактивни локации кои се наоѓаат на 350 метри  од  плоштадот и на 200 метри од градскиот парк, а во зависност од идеите на инвеститорите може да се изградат од 6 до 10 колективни згради. Градоначалникот Зоран Заев упати јавен повик  до сите заинтересирани инвеститори, а посебно до  опозицијата во Струмица, ВМРО ДПМНЕ, да се јават на лицитацијата за да можат да купат маркици за парцели каде ќе можат да градат колективни згради.

-Почитувани граѓани би сакал да ве информирам дека општина Струмица повеќе од десет месеци управува со државното градежно земјиште, се спроведуваат доста лицитации и во контекст на тоа сакам да апелирам до сите заинтересирани инвеститори за изградба на колективни згради дека општина Струмица распиша тендер преку јавните гласила кој е објавен на веб страната на општината, во службен весник и во весниците „Капитал“ и „Утрински весник“. Таму можат да видат јавна објава за локации за изградба на згради во делот на касараната. Сакам  да апелирам до сите заинтересирани инвеститори да се јават, цената е 2.030 денари од метар квадратен како почетна цена за лицитација, посебно сакам да апелирам до пријателите од опозицијата во Струмица ВМРО ДПМНЕ, до бизнисмени блиски на ВМРО ДПМНЕ, до сите генерално заинтересирани потенцијални инвеститори да се јават на оваа лицитација за да можат да купат маркици за да градат колективни згради. Се работи за парцели на кои ќе може согласно идеите и креациите на потенцијалните инвеститори да се изградат од 6 до 10 згради во зависност од нивната големина. Локациите се наоѓаат на 350 метри од плоштадот во Струмица и се на 200 метри од градскиот парк, апсолутно една од најповолните локации во општина Струмица и навистина  се надевам дека ќе има интерес. Во функција на транспарентноста, потенцирам до сите заинтересирани, замолувам, повикувам, да се јават на јавните лицитации за колективните згради  што се објавени за продажба од страна на општина Струмица, рече градоначалникот Зоран Заев.

 

 

На јавни собири со граѓаните градоначалникот Зоран Заев ќе го крои буџетот за 2013 година

Синоќа во Домот на АРМ во Струмица стартуваа јавните собири со граѓаните од урбаните и месните заедници во општина Струмица. Средбите се одржуваат по седми пат на  иницијатива на градоначалникот Зоран Заев и преку нив се зголемува транспарентноста на општината и им се овозможува на граѓаните активно да учествуваат во изготвувањето на партиципативниот буџет на општината. На овој начин се подобруваат условите за живот на граѓаните во урбаните и месните заедници. Првиот собир се одржа со граѓаните од прва, трета, четврта и петта урбана заедница во градот. Граѓаните заедно со градоначалникот отворено зборуваа за тековните проблеми со кои се соочуваат, но и се нудеа решенија за нивно надминување. Реконструкција на улици, водоводни линии, поплочување на тротоари, беа само дел од предлозите кои граѓаните ги презентираа пред градоначалникот, а кои ќе се најдат во нацрт планот на програмата за комунално уредување за 2013 година.

- Општина Струмица е прилично урбано и комунално решена општина, но никогаш нема крај на активностите кои значат подобрување на квалитетот на живеење на граѓаните и така вечерва почнуваме со прва, трета, четврта и петта урбана заедница, утревечер со втора шестта, седма и осма урбана заедница и продолжуваме по сите населени места за да ги дефинираме приоритетите за буџетската 2013 година. Очекуваме околу 10 ноември да завршиме со сите овие постапки за да имаме време до крајот на ноември за предлозите и сугестиите што се на општинската администрација, сето тоа што ќе стигне по пат емаил, петиции од граѓаните, писма до градоначалникот да го ставиме во буџетот за да биде предложено пред Советот на општината. Ваквиот начин ни дава и консензуална поддршка од страна на советниците кога  ги консултираме сите граѓани и се надевам дека и оваа година ќе биде така. Граѓаните кај нас се изворот на идеите, јас сум задолжен пред се за собирање на приходниот дел на буџетот, значи финансиите да се обезбедат, а граѓаните ги даваат буквално сите сугестии. Убеден сум дека и оваа година ќе има убави предлози за  буџетската 2013 година кои што ќе значат подобро место за живеење во сите населени места во општина Струмица, а и во градот, рече градоначалникот Зоран Заев.

Временска прогноза за четврток, 18 октомври

Денес ќе биде еден сончев ден со дневна температура до 26 °C

 

Фросина Андреева во петок ќе се натпреварува за најдобар ,,Млад библиотекар” во Македонија

Фросина Андреева од ООУ ,,Видое Подгорец” ќе ја претставува Струмичката библиотека на Републичкиот натпревар ,,Млади библиотекари” кој ќе се одржи задутре, 19-ти октомври во Скопје.

Таа беше најдобра на овогодинашниот општински натпревар во Струмица и со максимално освоени 186 поени позади себе остави 29 кандидати. Покрај теорискиот дел кој и е веќе совладан, Фросина овие денови со поддршка на директорката на струмичката библиотека ,,Благој Јанков Мучето”, Тања Гошева, посвети внимание и на совладувањето на практичниот дел.

,,Мислев дека работата во библиотеката е едноставна, но кога ми покажаа какво е вистинското библиотекарско работење, мислењето ми се промени. Секоја книга мора да се заведе по своја категорија, секоја има свое место. Јас сакам да ги редам книгите, го сакам бибилиотекарстовот, затоа и се пријавив на овој натпревар.” – кажува Фросина Андреева.

Интересен е фактот што оваа четиринаесетгодишно девојче има научено да чита во својата четврта година.

,,Како мала сакав да гледам филмови, и за да не и досадувам често на мајка ми да ми го чита преводот ја замолив да ме научи на азбуката. И со четири години научив да читам. Од тогаш ми е се поинтересно, тогаш ми се отвори светот на книгите” – објаснува Фросина.

За Републичкиот натпревар кажува дека има малку трема, но тоа не и го одвлекува вниманието. Во конкуренција од натпреварувачи од триестина градови од Македонија, ќе вложи труд и се надева дека ќе и донесе на Струмица добар пласман.

 

Јавните собири со граѓаните на општина Струмица стартуваат од вечерва

На иницијатива на градоначалникот на општина Струмица Зоран Заев, од вечерва ќе почне одржувањето на јавни собири на граѓаните во урбаните, односно месните заедници. Во салата на домот на АРМ со почеток во 19 часот ќе се одржи јавен собир за граѓаните од првата, третата, четвртата и петтата урбана заедница. На собирот граѓаните ќе ги изнесат тековните проблеми во нивните урбани заедници, но и инфраструктурните потреби кои ќе влезат во нацрт планот на програмата за комунално уредување за 2013 година. Утревечер во истиот термин ќе се одржи собир на граѓаните од втората, шесттата, седмата и осмата урбана заедница.

 

Временска прогноза за среда, 17 октомври

Времето денес сончево и топло со дневна температура до 25 степен.

СОУ „Димитар Влахов“ го одбележи Светскиот ден на храната

Учениците и вработените во средното општинско училиште „Димитар Влахов“ во Струмица, денеска се вклучија во одбележувањето на Светскиот ден на храната -16 октомври. На прекрасно уредени штандови во спортската сала на училиштетото беше презентиран богат избор на храна подготвена во домашни услови и во преработувачката индустрија, но и свеж зеленчук и овошје типични за ова поднебје. За значењето на Светскиот ден на храната пред домаќините и гостите зборуваше директорот на училиштето, Димитар Ѓорѓев.

- Производството на здрава храна, произведена на органски начин без пестициди, осовременување на начинот на производство и конкурентноста, се основните темели на кои децении наназад цврсто и сигурно опстојува СОУ „Димитар Влахов“. Водени од мудроста на древните Кинези „Кој и да и е татко  на болеста, мајка и е лошата исхрана“, сакаме да создадеме генерации кои ќе имаат поинаков однос кон храната, начинот на нејзино производство и нејзиното консумирање. Нашата мисија ќе биде успешно завршена кога нашите ученици ќе станат лидери, но истовремено и борци за здрав начин на живот, кој е возможен само преку здравата и правилна исхрана, рече Димитар Ѓорѓев директор на СОУ „Димитар Влахов“.

Светскиот ден на храната за прв пат се одбележа во ноември 1979 година со една единствена цел, да ја разбуди свеста на современиот човек за проблемите поврзани со сиромаштијата.

Поделени пакети со храна на најзагрозените граѓани од Струмица

Во  склоп на хуманитарната акција ,,Недела против гладта”, организацијата ,,Банка за храна на Македонија” во соработка со ,,Организација на жени во Струмица” организираше собирање на прехрамбени производи за најзагрозените граѓани, а пакетите со донирана храна се поделија денеска во Дом на АРМ со што и во Струмица се одбележа 16-ти октомври – Светскиот ден на гладта.

,,Бидејќи ова се почетоците на оваа акција, неможам да кажам дека одзивот на струмичани е мал, но секогаш луѓето можат повеќе да донираат” – изјави Катарина Поп – Стојанова, координатор на Банка за храна на Македонија.

Пакетите со најосновните намирници беа поделени на најзагрозените граѓани во Струмица, самохраните мајки, жртви од насилство и луге кои се наоѓаат на работ од егзистенцијата.

 

 

Градоначалникот Заев на јавни собири со граѓаните на општина Струмица

На иницијатива на градоначалникот на општина Струмица Зоран Заев, а согласно законските и статутарните овластувања, од 17 октомври ќе почне одржувањето на јавни собири на граѓаните во урбаните, односно месните заедници. За граѓаните од првата, третата, четвртата и петтата урбана заедница собирот ќе се одржи утре (среда) со почеток во 19 часот во салата на домот на АРМ во Струмица. На јавниот собир граѓаните ќе имаат можност отворено да зборуваат за тековните проблеми со кои се соочува урбаната заедница, а кои се во надлежност на локалната самоуправа. Ќе се забележат и сите инфраструктурни потреби од комунална и градежна природа, а со цел да влезат во нацрт планот на програмата за комунално уредување за 2013 година. Инаку, до 7 ноември оваа година планирано е да се одржат вкупно 18 јавни собири со граѓаните од урбаните и месните заедници во градот и 16 населени места.

Capture