Нов изглед на шеталиштето од плоштадот до паркот

Нов лик ќе добие шеталиштето од градскиот плоштад до паркот, односно од кафе барот  „19“ до пред споменикот на Револуцијата. Градежните зафати за подземната електрична инсталација се во тек, а од утре ќе почне поплочувањето со гранитни плочки во комбинација со травертин. Откако ќе заврши поплочувањето ќе биде поставена и комплетна урбана опрема. Вкупната површина која ќе биде реконструирана изнесува околу илјада метри квадратни, а реконструкцијата е финансирана од буџетот на општина Струмица. Со новиот лик на шеталиштето, граѓаните на Струмица добиваат уште едно прекрасно место кое  ќе се вклопи во модерниот изглед на градскиот плоштад.

 

Интервенции на ТППЕ – Струмица во изминатата недела

Во изминатата недела територијалната професионална противпожарна единица на Струмица имала вкупно четири  интервенции. Со пожарникари и возила се интервенирало на две  локации во градот, на улицата „Димитар Цветинов 9А и на раскрсницата на ул. Младинска и бул. Г.Делчев“ со гаснење на дел од запалена електрична инсталација  и  техничка интервенција, црпење вода од ископан дел од улица. Освен во градот, пожарникарите имале работа и во индустриската зона Север како и во с.Куклиш . Во с.Куклиш имало техничка интервенција на сообраќајна несреќа, а во индустриската зона Север се гаснело запален отпад во кругот на магацин. Со брзото делување на противпожарната единица во сите пет случаи, се спречени последици од поголеми размери.

Временска прогноза за понеделник, 5 ноември

Денес во Струмица облачно, без врнежи. Дневна температура до 21 °C

„Малиот принц”- нова престава во НУЦК „Антон Панов”

Вечерва во 19 часот во НУЦК „Антон Панов„ премиерно ќе биде изведена новата представа „Малиот принц’’.
Претставата е подготвена од Драмско- кукленото студио „Думон’’, во режија на Јасмина Вучкова.

 

Временска прогноза за недела, 4 ноември

Денес во Струмица облачно со сончеви периоди. Дневна температура до 20 °C

 

Временска прогноза за сабота, 3 ноември

Денес во Струмица сончево, без врнежи. Дневна температура до 22 °C.

 

Од општина Струмица со реакција на прес-конференција на ОК на ВМРО ДПМНЕ Струмица одржана на ден 02.11.2012г.

Општина Струмица и градоначалникот Зоран Заев не и делеа лекции на владата само во 2011 година туку сиве овие седум години колку што ВМРО ДПМНЕ е на власт во Р.Македонија. Празната реторика на кутрата портпаролка на ОК на ВМРО ДПМНЕ и безидејноста на нејзините работо давачи, во обидот да пронајдат сламка за спас од она што ги очекува на локалните избори, повторно сакат да им фрлат прашина во очи на граѓаните од општина Струмица. Многу е тешко да се зборува нешто во што и самите тие не веруваат, а притоа сакаат да им поверуваат граѓаните. Вистината вели дека од предвидените фабрики во зона Сачево, веќе седум компании имаат одобрени за градење на фабрики во вкупна површина од 40.000 метри квадратни. Останатите компании се во исчекување на приклучок од гасната мрежа како и дислокација од страна на ЕВН на постоечките далноводи кој се наоѓаат на самата индустриска зона.

Дами и господа од ОК на ВМРО ДПМНЕ, дали Заев го бидува или не не се прашувате вие туку граѓаните на општина Струмица. Вие како да живеете во Валандово или Радовиш, а не во Струмица па од безмалку 2000 реализирани проекти не успевате да дететктирате ниту еден. Господ ви дал очи па не е лошо да ги отворите. Ако свесно мижете пред проектите тогаш дојдете во општинската зграда да ги погледнете бројните награди што градоначалникот Заев ги доби за сработеното во изминатиот период.

Зошто во сите комбинаторики што вашата партија ги прави за локалните избори, дури и во најоптимистичките варијани за вас, Струмица ви е зацртана како невозможна мисија за победа. Третиот последователен пораз со голема разлика ќе ви даде до знаење дека вашите празни зборови и делата на Заев се две дијаметрално спротивни работи.

Со почит,

 

ОПШТИНА СТРУМИЦА

Кабинет на Градоначалник

 

Од петок до понеделник Циркусот во Струмица

 

Денеска кај спорската сала „Парк“, зафатени во унгарскиот циркус „Сафари“ вредно ја поставуваа опремата и се подготвуваа за вечерашната премиера која ќе биде изведена пред струмичката публика со почеток во 18:00 часот.
Нилскиот коњ, лавовите, слоновите, афричките биволи, камилите, кловновите, артистите, акробатите, … сите тие се дел од сензацијата која струмичани ќе можат да ја видат во циркуските представи во овие 4 дена (од 02-05 ноември)
Циркусот „Сафари“воедно е и модерен и традиционален, доаѓа од Унгарија и постои од далечната 1968 година.

Општина Струмица донираше грејни тела на Здружението на слепи лица

Во рамките на континуираната соработка и поддршка со невладиниот сектор, општината донираше две грејни тела на Здружението на слепи лица во Струмица. Со оваа донација се надмина проблемот со затоплувањето на просторијата во која функционира Здружението. По предавањето на донацијата се одржа заедничка  средба меѓу претставниците на општина Струмица и Здружението на слепи на која се разговараше за проблемите со кои се соочува оваа ранлива категорија на луѓе.

Претседателот на Советот на општина Струмица Марјан Даскаловски,  рече дека локалната власт и досега го помагала Здружението со технички помагала, компјутери, работни маси и столови, а ќе продолжи и понатаму со сите расположливи средства да ги помага членовите. Во таа насока, општината ќе ги поддржи и регионалните средби со другите вакви здруженија во регионот и турнирот во шах за слепи лица. Претставниците на Здружението се заблагодарија за донацијата и побараа да се посвети поголемо внимание во вработувањето на слепите лица. Здружението на слепи лица во Струмица има околу 100 членови.

 

Временска прогноза за петок, 2 ноември

Денес во Струмица облачно со шанса за врнежи.