Временска прогноза за петок, 21 декември

Времето денеска во Струмица сончево со повремени заоблачувања. Без врнежи. Максимална дневна температура до 7 степен.

Полицајците ги советуваат учениците да не користат пиротехнички средства

Одделението за превенција при СВР-Струмица организира едукативни предавања за учениците од средните училишта во Струмица на тема „Последици од употреба на петарди и други пиротехнички средства’’. Цел на едукацијата е да се намали употребата на пиротехнички средства, пред  се петардите, во текот на новогодишните празници, и да се сфати сериозноста од нивното користење како и последиците кои можат да предизвикат изгореници, оштетувања на лицето и видот, како и откинување на делови на екстремитети, најчесто на рацете.

Едукативниот проект започна денеска во СОУ „Димитар Влахов’’ и „Никола Карев’’, а утре ќе продолжи во струмичката гимназија „Јане Сандански’’.

 

„Играта продолжува…“ – акција за собирање на употребени играчки

Бидејќи традиционално периодот околу Нова година се поврзува со благосостојба и подароци, ЗГ„Продолжен живот’’ и Македонската платформа против сиромаштија организираат утре активност „Играта продолжува…“ – акција за собирање на употребени играчки (и боички, боенки, книги или украси за деца) и нивна донација на деца кои живеат во сиромаштија или се социјално исклучени.
Ве молиме да се приклучите и да го дадете својот активен придонес – донесете играчки (ваши, од вашите деца, од соседите, од колегите), информирајте ги вашите пријатели за акцијата или поканете и други организации да ни се приклучат во неа.
Ние ќе бидеме на плоштадот утре од 20,00 до 22,00часот и ќе Ве очекуваме!

 

Вечерва концерт во НУЦК „Антон Панов’’

Вечерва во 20 ч. Концерт на Гордана Јосифова Неделковска – обоа и Елена Атанасовска  Ивановска- пијано придружба

 

 

 

 

Временска прогноза за четврток, 20 декември

Времето денес променливо облачно без врнежи во текот на денот. Максимална дневна температура до 8 степен.

Споменикот на Борис Трајковски

„Сите заедно споделуваме една единствена судбина наречена Македонија’’, пишува на еден  од карактеристичните споменици во Струмица, на Споменикот на Борис Трајковски, прерано загинатиот претседател на Република Македонија. Спомен бистата на претседател е изработена од бронза и поставена е на постамент од мермер. Во позадината на бистата Борис Трајковски стои женска фигура во човечки раст која ја преставува Македонија. Таа во раката држи крст како симбол на христијанство, бидејќи Струмица е позната како центар на христијанска религија.

Споменикот е дело на рускиот скулптор Грегориј Потоцкиј и  се наоѓа  во Градскиот парк и целиот е сместен во хортикултурно уредена средина.

 

 

Легендите за Свети Никола

Свети Никола Чудотворец на иконите е прикажан како стар бискуп со закривен бастун / стап и бискупска капа и три златни топки на книгата чија симболика е легендата со трите керќи во јавната куќа и вреќичите злато. Многу легенди настанале за личноста и делото на Св. Никола во касниот среден век и многу се поврзани со дарувањето. Познато е дека Св. Никола е всушност тој кој пред Нова Година доаѓал и им подарувал на децата (ако биле добри) по нешто слатко од вреќата. Традиционални дарови се јаболка, лешници и бадеми. Еве неколко легенди за овој Чудотворец…

- Еден осиромашен царски службеник кој живеел во близина на родителската куќа на Никола, сакал да ги омажи своите три керќи, но немал пари за руба.Така ги испратил во јавна куќа, да би заработиле за сопствената руба. Кога дознал Св. Никола, вечерта низ нивниот прозорец им фрлил вреќичка со златници, со што ќерките достоинствено се омажиле

-Во една гостилница дошле гладни ученици, но наместо да ги нагости, газдата ги убил и сакал да ги насоли. Се појавил Св. Никола кој ги оживеал и соодветно го казнил сторителот

-  ….еден брод западнал во бура на море. Морнарите се молеле на Никола за помош и тој го смирил, па затоа тој се смета и за заштитник на морнарите и патниците.

 

Струмица се вклучи во програмата за Сертификација на поволна деловна клима

Општина Струмица како еден од лидерите во економскиот развој во државата, а со тоа и препознатлива меѓу општините од Југоисточна Европа, се вклучи во програмата за Сертификација на поволното деловно опкружување.
Целта на вклучувањето е да ја потврди потребата за дејствување заради воспоставување на потребните стандарди за подобрување на бизнис климата во општината.
Во септември оваа година, општина Струмица до комисијата за евалуација го поднесе првиот сет на докази за досегашниот општинскиот напор за исполнување на критериумите , а со тоа и продолжување на заложбата за создавање на поволна бизнис клима на локално ниво.
Врз основа на тоа, комисијата за евалуација направи прелиминарен извештај и во денешната работна посета на општина Струмица ги потврдуваше приложените докази во рамките на утврдените 12 критериуми.
Во наредниот период следува посета од независна верификациона комисија за да ја потврди веродостојноста на доказите, а со тоа да ја потврди и општина Струмица како поволна бизнис дестинација.

 

 

Временска прогноза за среда, 19 декември

Денес во Струмица облачно со снег. Максимална дневна температура до  6  oC

 

Струмица повеќе децентрализирана од другите општини во Македонија

Струмица има поголем просек од другите општини во Република Македонија, покажало теренското истражување во рамките на проектот „Транспарентна и ефикасна децентрализација“ чии резултати денеска беа презентирани во просториите на домот на АРМ.

Проектот го спроведоа Фондацијата Отворено општество – Македонија во соработка со Центарот за развој на локалната демократија во 12 општини во периодот 2011 – 2012 година, а целта е да се измери и подобри степенот на спроведување на процесот на децентрализацијата на локално ниво.
Во трите анализирани години највисоки оценки имаат добиено услугите од областа на образованието, спортот и културата. Најслабо оценети се услугите во локалниот економски развој и социјалната заштита, но во 2012 година се забележува подобрување на средната оценка за овие две услуги во однос на претходните години.Теренското истражување  за мерење на задоволството на граѓаните од услугите што ги добиваат од локалните власти во 2012 година покажало дека просечното задоволство на граѓаните од општина Струмица е зголемено во 2012 година со средна оценка 3,50 во однос на 2011 и 2010 година.

Според Јане Вртески од Центарот за развој на локалната демократија, генерално процесот на децентрализација во Република Македонија е во стагнација

- Велиме стагнација, затоа што во изминатите четири години има придвижување, меѓутоа тие се  минимални во позитивна насока во делот на децентрализацијата и не може да се зборува за некакви значајни напредоци во целиот овој процес. Во однос на просекот  кој што го имаме и во тој контекст општина Струмица е доста над просекот на кој што се другите општини во Република Македонија, рече Вртески. 

За Тони Милушев, раководител на одделението за локален економски развој, резултатите од истражувањето  уште еднаш го потврдуваат напредокот на општина Струмица, а со тоа го потврдуваат и капацитетот на општината за ефикасно спроведување на процесот на децентрализацијата во следните фази.

 

 

 

Capture