Струмичка кујна Ајвар / Ајвер

Ајварот, на струмички ајверо, можеме слободно да кажеме дека е наш кавијар. Се прави низ цел Балкан, рецепти има многу, па и во Струмица ги има сигурно повеќе.2016-09-24_20-20-59_s

Во стари времиња се правел малку поинаку. За да трае, се пржел многу долго, зејтинот се пуштал, пливнувал како велиме. Подоцна се појавува овој денешниот кој е како мајонез, многу се внимава зејтинот да не се пушти. Познавам луѓе кои и денеска си прават старински ајвер кој мене многу ми се допаѓа.
Критики за ајверот има, после толку печење и пржење, ништо не останува здраво, велат…
Можеби е така, но вкусот на ајверо е незаменлив, уникатен. Дали е правен на старински начин или како мајонез, оној денешниот, секако си е вкусен.
Многумина ќе речат, не е важно тоа, здрав – нездрав, битна е атмосферата што се создава додека се прави…
И вистина е така, Ајварот ги собира и големите и малите, собира цели семејства, комшии…
Ги собира сите вредни раце, сите шеги, сите попатни специјалитети…
Во септември, чади секаде низ Балканот, се знае, се прави неговото Височество-Ајварот!
Се прават огромни количини, се подаруваат тегли, се праќаат во странство, ајвер во куфери, торбици, извоз…
Нека чуе светот што повеќе за нашиот ајвер, редно е!
Оваа рецепта е едноставна, не може да се погреши ништо, а ајварот е превкусен.2016-09-23_15-24-40_s
Состојки
пиперки за ајвар
модри патлиџани
зејтин
сол
лути пиперки, по желба
На 1 кг пиперки треба 1 модар патлиџан, зејтин 1-2 дл, но сепак дозите си ги прилагодувате према потребите и вкусовите.
Постапка
2 – 3 денови, сигурно треба да одвоите за ајварот…Ви треба и убаво време, дворче, печка, дрва, вредни раце…
  1. Прв ден. Пиперките и модрите патлиџани се подготвуваат за печење. Се печат.
  2. Се задушуваат за полесно да се лупат.
  3. Втор ден. Се чистат од дршки и семки, но убаво е да остане и по некоја семка, повкусно е. Се ставаат на цедење, цела ноќ.
  4. Трет ден. Се мелат со мелница за месо.
  5. Се пали оган. Се става во тавата за пржење, почнува да се пржи. Мора да се меша постојано.
  6. По некое време пржење, се додава зејтинот, малку по малку, како кога се прави мајонез. Постојано се меша. На крај се додава сол, се пржи уште кратко време. Кога ќе се направи трага од лажицата на дното од тавата, ајварот е готов!
  7. Се става во стерилни тегли, се притиска со лажица да нема празнини и се затвара. Теглите може да се стават во рерна на 50 степени, околу десетина минути и потоа да се исклучи рерната. Може да се завиткаат во стари ќебенца и утредента да се наредат на суво, темно и свежо место.
Ајварот е салата, но ние го јадеме и како салата и како појадок, ручек, вечера…Сирење, леб и ајвер, одгледаа многу генерации! Нека ни е на здравје!

пишува:  Весна Рохр - Со љубов, за вас / https://www.facebook.com/mojataIva85/

www.vesnarohrrecepti.com

Comments are closed.

Capture